ചാറ്റൽമഴ പേമാരിയായ് ദ്രുതം,
ചീറിയടിക്കും കാറ്റകമ്പടിയായ്,
ദിഗന്തങ്ങൾ മുഴങ്ങും മേഘഗർജ്ജനം,
കണ്ണഞ്ചും മിന്നലും ചിത്തത്തിൽ ഭീതി വിതച്ചു,
കര കവിഞ്ഞൊഴുകി നദികൾ,
പാതകൾ നദികളായ്, ദുസ്സഹമായ് ജീവിതം;

മഴുവിന്നിരയായ് കാനനങ്ങൾ,
മലകളിടിച്ചു നിരത്തി മനുഷ്യ മൃഗങ്ങൾ,
കണ്ടൽക്കാടുകൾ കാണ്മാനില്ല,
തോടുകൾ മൂടി, വയലുകൾ നികത്തി,
ഹർമ്മ്യങ്ങൾ ഉയർന്നൂ നീളെ;
മണ്ണിൽ സസ്യങ്ങളില്ല, ടൈലുകൾ മാത്രം.

എന്തിന് പഴിക്കുന്നു പ്രകൃതിയെ
മർത്ത്യൻ തൻ ദുഷ്കർമ്മഫലങ്ങൾ
അനുഭവിക്കും മർത്ത്യൻ മാത്രം;
വിസ്മരിക്കരുതൊരു മാത്ര പോലും നാം,
ദൈവത്തിൻ വരദാനമാണ് പ്രകൃതി.

[Originally written in English – Climate Change and the Environment – and translated into Malayalam by the author M. Madhavanakutty himself]